Kryeministri Edi Rama ka përshëndetur zgjedhjen e Klodian Brahos si drejtues të ri të Prokurorisë së Posaçme kundër Korrupsionit dhe Krimit të Organizuar (SPAK). Përmes një reagimi në rrjetet sociale, Rama ka uruar suksese për Brahon në kryerjen e detyrës së re dhe ka theksuar se SPAK do të vijojë të ketë mbështetjen e plotë të qeverisë.
Kreu i ekzekutivit vlerësoi gjithashtu punën e Altin Dumanit, drejtuesit në largim të SPAK, duke e cilësuar mandatin e tij trevjeçar si një periudhë me rezultate të pamohueshme.
Në reagimin e tij, kryeministri theksoi se zgjedhja e Brahos mes katër kandidatëve shënon vazhdimësinë e punës së institucionit në mandatin e tij të tretë, ndërsa garantoi se mbështetja politike për pavarësinë dhe funksionimin optimal të SPAK do të mbetet e pandryshuar.
