Me rastin e Ditës Botërore të Poezisë, Europe House organizoi një sërë aktivitetesh që bashkuan poetë, artistë dhe publikun, të cilët së bashku e shënuan këtë ditë përmes gjuhës dhe dialogut.
Ngjarjet kryesore u mbajtën në Europe House Shkup dhe Europe House Tetovë, me fokus në lidhjen e poetëve që krijojnë në gjuhën shqipe dhe maqedonase. Këto aktivitete krijuan një hapësirë ku poezia përjetohet si një gjuhë e përbashkët, përtej dallimeve dhe barrierave.
Në Shkup, ngjarja “Ndërmjet dy vargjeve – Меѓу два стиха” u konceptua si një dialog poetik ndërmjet gjuhëve. Çdo poezi fillimisht lexohej në versionin origjinal, e më pas përcillej përmes përkthimit në gjuhën tjetër, duke i mundësuar publikut ta përjetojë kuptimin e vargjeve në të dy gjuhët. Poezitë e tyre i lexuan Marija Velinova, Lira Bojku, Ivana Jovanovska, Valdeta Dulahi, Stefan Spasovski dhe Kaltrina Sadiki, ndërsa moderatorë të ngjarjes ishin Arlinda Baftiu dhe Andrej Medik Lazarevski. Ky format mundësoi ndërveprim të drejtpërdrejtë me publikun dhe krijoi një përvojë unike të ndërtuar përmes poezisë.
Në Tetovë, ngjarja “Kur fjalët bëhen imazhe – Кога зборовите стануваат слики” solli një eksperiment kreativ ndërkulturor që e lidhi poezinë me artin pamor. Nën moderimin e Era Gjakovës, poetët lexonin në gjuhën e tyre amtare, ndërsa të pranishmit paralelisht e shndërronin atë që dëgjonin në vizatime. Ky proces intuitiv i nxiti pjesëmarrësit të reagojnë jo vetëm ndaj kuptimit, por edhe ndaj emocionit të çdo poezie. Në këtë mënyrë u krijua një dialog ku barrierat gjuhësore tejkalohen, dhe poezia përjetohet si përmes fjalës, ashtu edhe përmes figurës.
Shënimi i Ditës Botërore të Poezisë u realizua edhe në Strugë, qytet me një identitet të fortë poetik. Si qytet i poezisë, Struga ka një vend të veçantë në peizazhin kulturor të vendit, ndaj një pjesë e madhe e aktiviteteve janë të orientuara drejt kultivimit të shprehjes poetike dhe mbështetjes së artit. Në këtë kontekst, Europe House edhe këtë vit do të mbështesë çmimin “Enhalon” në kuadër të festivalit “Mbrëmjet Poetike të Strugës”.
Përmes këtyre aktiviteteve, Europe House forcon përkushtimin e saj ndaj dialogut, shkëmbimit kulturor dhe shprehjes artistike. Duke bashkuar gjuhë dhe komunitete të ndryshme, shënimi i këtij viti i Ditës Botërore të Poezisë krijoi një moment lidhjeje, ku poezia u dëshmua si një pikë e përbashkët mirëkuptimi.
