PRISHTINË – Kryetari i Komunës së Strugës, Mendi Qyra, mori pjesë si panelist në Kosova Business Forum, në diskutimin me temë: “Trendet e investimeve në sektorin e patundshmërive në Ballkanin Perëndimor”, të moderuar nga Astrit Panxha.
Gjatë forumit, ku ishin të pranishëm edhe Ministri i Ekonomisë i RMV-së, Besar Durmishi, dhe Ministrja e Industrisë dhe Tregtisë e Kosovës, Mimoza Kusari-Lila, Kryetari Qyra ndau analiza konkrete mbi zhvillimet në tregun e pasurive të paluajtshme, duke gërshetuar përvojën e tij në sipërmarrje me angazhimin në qeverisjen lokale.
Sfidat ligjore dhe investimet e huaja
Kryetari Qyra ngriti si shqetësim faktin se, pavarësisht interesit të lartë për investime në Kosovë dhe Maqedoninë e Veriut, kuadri ligjor aktual mbetet një pengesë serioze. Ai theksoi se pamundësia e personave juridikë për të blerë prona kufizon ndjeshëm potencialin për investime të huaja në rajon.
Potenciali ekonomik i Strugës
Në fjalën e tij, Qyra u ndal te specifikat e Strugës, duke vënë në dukje se:
-
Ndërtimtaria: Megjithëse njihet si qytet turistik, ndërtimtaria aktualisht është burimi kryesor i të ardhurave.
-
Turizmi i qëndrueshëm: Struga posedon të gjitha parakushtet (liqenin, lumin, malet dhe afërsinë me aeroportin) për një zhvillim të mirëfilltë ekonomik.
“Është detyrë e institucioneve, si në nivel lokal ashtu edhe qendror, që ky potencial i jashtëzakonshëm të menaxhohet në mënyrë efikase dhe të vihet në funksion të zhvillimit ekonomik dhe mirëqenies së qytetarëve”, theksoi Kryetari Qyra.
Pjesëmarrja në këtë forum vlerësohet si një hap i rëndësishëm drejt forcimit të bashkëpunimit rajonal dhe krijimit të mundësive të reja për zhvillim të qëndrueshëm.
