Myftinia e Tetovës u ka përcjellë një njoftim të rëndësishëm të gjithë besimtarëve myslimanë: nga nesër, më 21 dhjetor 2025 (e diel), fillon zyrtarisht periudha e shenjtë e tre muajve të bekuar – Rexhep, Shaban dhe Ramazan.
Kjo periudhë konsiderohet si një stacion i rëndësishëm shpirtëror, që shërben si përgatitje për muajin e madhërueshëm të Ramazanit. Muajt Rexhep dhe Shaban janë kohë e veçantë për pendim (istigfar), shtimin e veprave të mira dhe afrimin me krijuesin përmes adhurimeve të shtuara.
Mesazhi i Myftinisë: Në njoftimin e saj, Myftinia e Tetovës bën thirrje që këto ditë të shfrytëzohen maksimalisht për reflektim dhe lutje.
“Këta muaj janë një kohë e veçantë për pendim, adhurim dhe përgatitje shpirtërore. Urojmë që kjo periudhë të jetë e begatë për të gjithë besimtarët dhe të shfrytëzohet me vepra të mira,” thuhet në kumtesë.
Kjo kohë shënon gjithashtu fillimin e numërimit mbrapsht për muajin e agjërimit, duke krijuar një atmosferë festive dhe shpirtërore nëpër shtëpitë dhe xhamitë e Tetovës.
