Bogovinë, 19 dhjetor 2025 – Kryetari i Komunës së Bogovinës, Feti Abazi, ka njoftuar sot emërimin e Ilir Nurishit në pozicionin e ushtruesit të detyrës së Drejtorit të Ndërmarrjes Publike Komunale “Sharri”.
Në postimin e tij zyrtar në Facebook, Abazi ka theksuar cilësitë personale dhe profesionale të drejtorit të ri.
“Iliri është një djalë fisnik, me shumë energji dhe mbi të gjitha punëtor. Ndërmarrja ka nevojë për një shtytje të re, organizim më të mirë dhe funksionalitet të plotë. Ne jemi të bindur se drejtori i ri do të arrijë objektivat që ka para vetes dhe para qytetarëve të Bogovinës”, ka shkruar kryetari Abazi.
Ai i ka uruar Ilir Nurishit punë të mbarë dhe suksese të mëdha në kryerjen e detyrës së re.
Ndërmarrja Publike Komunale “Sharri” merret me shërbime esenciale për qytetarët, si pastërtia publike, mirëmbajtja e hapësirave të gjelbra dhe shërbime të tjera komunale. Emërimi i ri pritet të sjellë përmirësime në efikasitetin dhe cilësinë e shërbimeve për banorët e Komunës së Bogovinës.
Kryetari Feti Abazi vazhdon të fokusojë punën e administratës komunale në përmirësimin e shërbimeve publike dhe zhvillimin e infrastrukturës lokale.
