Një iniciativë për organizim të ri territorial në Shqipëri është dorëzuar zyrtarisht në Tiranë.
Shoqata “VMRO-DPMNE Shqipëri” i ka dërguar një kërkesë zyrtare Komisionit Parlamentar për Reformën Administrativo-Territoriale në Tiranë, ku propozon formimin e dy komunave të reja: Golo Bërdos (Gollobordës) dhe Gorës, si pjesë e ndryshimeve të paralajmëruara në organizimin territorial të shtetit.
Sipas kryetares së shoqatës, Elena Simonovski, iniciativa ka për qëllim adresimin institucional të nevojave të banorëve të këtyre rajoneve dhe sigurimin e një mbrojtjeje më efikase të të drejtave të tyre të garantuara me kushtetutë. Ajo thekson se krijimi i komunave të reja do të kontribuonte në një përfaqësim më të drejtë lokal, qasje më të mirë në shërbimet publike dhe zhvillim rajonal më të balancuar.
“Kjo çështje nuk është vetëm administrative, por ka të bëjë me barazinë, dinjitetin dhe ruajtjen e identitetit. Këto rajone për vite me radhë janë përballur me neglizhencë institucionale, qasje të kufizuar në shërbime dhe përfaqësim të pamjaftueshëm në nivel lokal,” deklaroi Simonovski.
Pikat kryesore të kërkesës:
-
Përfaqësimi politik: Formimi i komunave do të nënkuptonte më shumë zë për qytetarët në institucione.
-
Zhvillimi lokal: Mundësi për projekte specifike që ndihmojnë komunitetet lokale.
-
Standardet evropiane: Harmonizimi me normat e BE-së për vetëqeverisjen lokale.
Shoqata u bën thirrje institucioneve shqiptare të dëshmojnë se parimet e barazisë dhe mosdiskriminimit vlenë për të gjithë qytetarët, duke e vlerësuar iniciativën si një mundësi për të korrigjuar atë që ata e quajnë “padrejtësi shumëvjeçare”.
Konteksti i reformës:
Kjo iniciativë vjen në kohën kur po përgatitet ligji i ri për ndarjen territoriale në Shqipëri. Me reformën e vitit 2017, numri i bashkive/komunave u reduktua nga 373 në 61, ku e vetmja njësi me popullsi dominuese maqedonase mbeti Pusteci.
Në atë kohë, komunat e mëparshme në Golo Bërdo dhe Gorë u shkrinë në njësi më të mëdha administrative, gjë që sipas parashtruesve të kërkesës, ka rezultuar në uljen e dukshmërisë dhe përfaqësimit të popullatës lokale.
