Sekretari i Përgjithshëm i Partisë Socialiste, Blendi Klosi, ka njoftuar nisjen e procesit zgjedhor në strukturat e brendshme të partisë, i cili do të shtrihet nga 21 marsi deri më 30 qershor. Ky proces do të zhvillohet në disa faza të mirëpërcaktuara me qëllim forcimin e organizimit dhe rritjen e numrit të anëtarësisë.
Sipas kalendarit të prezantuar në mbledhjen e Asamblesë, fazat e riorganizimit janë:
-
21 mars – 16 prill: Analiza e detajuar e çdo organizate socialiste.
-
16 prill – 13 maj: Zhvillimi i zgjedhjeve brenda organizatave.
-
16 maj – 12 qershor: Zgjedhja e kryetarëve të partisë në nivel bashkie.
-
Deri më 30 qershor: Përfundimi i konstituimit të të gjitha strukturave lokale.
Objektivi kryesor i këtij procesi është që çdo organizatë të shtojë të paktën katër anëtarë të rinj, duke synuar barazinë gjinore (dy gra dhe dy burra) dhe përfshirjen e të rinjve. Klosi theksoi se qëllimi është shndërrimi i suksesit elektoral në një forcë më të madhe organizative, duke u shtrirë edhe në strukturat e partisë në diasporë dhe duke përzgjedhur drejtues vendorë me cilësi të lartë.
