Ministrja shqiptare e Jashtme vizitoi ish-presidentin e Kosovës në paraburgimin e Gjykatës Speciale, duke theksuar mbështetjen për një proces të rregullt dhe drejtësi historike.
Ministrja për Europën dhe Punët e Jashtme e Shqipërisë, Elisa Spiropali, ka zhvilluar sot një takim me ish-presidentin e Kosovës, Hashim Thaçi, në mjediset e paraburgimit të Gjykatës Speciale në Hagë.
Spiropali tha se Thaçi është në gjendje të mirë dhe vijon të ndjekë zhvillimet në Shqipëri dhe Kosovë. Ajo theksoi se i ka përcjellë mbështetjen e qeverisë shqiptare dhe të popullit shqiptar.
“Takova presidentin Thaçi dhe përmes tij dërgova përshëndetjet për të dhe bashkëluftëtarët Kadri Veseli, Jakup Krasniqi dhe Rexhep Selimi,” deklaroi ajo.
Ministrja theksoi mbështetjen e Tiranës zyrtare për një proces të drejtë dhe transparent:
“Shpresojmë që procesi të prodhojë drejtësi historike dhe jo padrejtësi. Lufta e Kosovës ishte për mbrojtjen e shtëpive dhe popullit, jo për agresion.”
Ajo shtoi se sakrificat e popullit të Kosovës dhe luftëtarëve të saj nuk duhet të njollosen, duke shprehur besimin se pas përfundimit të procesit do të triumfojë drejtësia.
