TETOVË – Në kuadër të aktiviteteve të muajit të bekuar të Ramazanit, Myftinia e Tetovës ka organizuar një mbrëmje të veçantë shpirtërore në Xhaminë e Re të Pallçishtit të Poshtëm. Protagonistë të kësaj vizite ishin Myftiu i Tetovës, Dr. Hfz. Selver ef. Xhemaili dhe mysafiri i nderuar nga Arabia Saudite, Shejh Jahja Hakemij, raporton Kohanews.
Ligjërata dhe namazi i teravisë
Mbrëmja nisi me një ligjëratë frymëzuese nga Myftiu ef. Xhemaili, i cili u ndal te vlerat e solidaritetit dhe devotshmërisë gjatë këtij muaji. Më pas, atmosfera u pasurua me namazin e jacisë dhe të teravisë, të cilat u udhëhoqën nga Shejh Jahja Hakemij. Zëri i tij dhe leximi i Kur’anit sollën një emocion të veçantë për xhematin e shumtë të pranishëm.
Për t’u mundësuar besimtarëve kuptimin e mesazheve të Shejhut, përkthimi u realizua nga hoxhë Arsim ef. Iseni, ndërsa namazi u shoqërua nga zëri melodioz i imamit Mr. Abid ef. Nesimi.
Një mesazh vëllazërie dhe shkëmbim dhuratash
Në përfundim të namazit, Shejh Jahja Hakemij përshëndeti besimtarët tetovarë, duke përcjellë mesazhe paqeje dhe vëllazërie islame. Në shenjë mirënjohjeje për vizitën dhe kontributin e tij, Myftinia e Tetovës i dhuroi mysafirit një pikturë me pamjen e Xhamisë së Larme, simbolit të trashëgimisë kulturore dhe fetare të qytetit.
Falënderim për komunitetin
Myftinia e Tetovës shprehu falënderime të përzemërta për këshillin e xhamisë dhe të gjithë besimtarët që kontribuan në organizimin e këtij takimi madhështor. Kjo vizitë rikonfirmon lidhjet e forta të Myftinisë me xhematet e rrethinës dhe angazhimin për të sjellë dijetarë të shquar pranë besimtarëve vendas.
/ KOHANEWS
