BOGOVINË – Zëvendësministrja e Transportit dhe Lidhjeve, Kaltrina Zekolli Shaqiri, ka vizituar sot Komunën e Bogovinës, ku është pritur nga kryetari i kësaj komune, Feti Abazi. Qëllimi kryesor i këtij takimi ishte dorëzimi i projektit bazë për rrjetin dytësor të ujësjellësit në vendbanimin Pallçisht i Poshtëm.
Ky projekt konsiderohet si një investim jetik për banorët e kësaj zone, duke u garantuar atyre furnizim të qëndrueshëm me ujë të pijshëm dhe duke ndikuar drejtpërdrejt në përmirësimin e cilësisë së jetesës dhe kushteve sanitare.
Nga premtimet në vepra konkrete
Gjatë takimit, zëvendësministrja Zekolli Shaqiri theksoi se ky hap është dëshmi e përkushtimit të koalicionit VLEN për të shndërruar zotimet parazgjedhore në rezultate të prekshme për qytetarët.
“Ky projekt është dëshmi e punës dhe përkushtimit tonë për të kthyer angazhimet në vepra. Një premtim i dhënë para zgjedhjeve, sot po merr përmasa reale,” u shpreh ajo.
Fokusimi te projektet infrastrukturore
Nga ana tjetër, kryetari i Komunës së Bogovinës, Feti Abazi, vlerësoi bashkëpunimin me nivelin qendror, duke nënvizuar se investimet në rrjetin e ujësjellësit janë prioritare për zhvillimin e qëndrueshëm të komunës.
Përfaqësuesit e Ministrisë së Transportit dhe Lidhjeve u zotuan se do të vazhdojnë me të njëjtin ritëm në të gjitha komunat, duke u fokusuar në projekte konkrete dhe rezultate të matshme që prekin nevojat bazike të secilit qytetar.
