TETOVË – Kryetari i Komunës së Tetovës, Bilall Kasami, ka mirëpritur sot në ambientet e komunës sportistët e rinj të Klubit të Karatesë “Shkëndija”. Karateistët e kategorive U13 dhe U14, të udhëhequr nga mjeshtri Vegim Murati, u nderuan për suksesin e tyre të jashtëzakonshëm në arenën ndërkombëtare.
Në Turneun Ndërkombëtar të Karatesë “Mustafë Blakaj”, të mbajtur në Istog të Kosovës, ekipi tetovar arriti të rrëmbejë gjithsej 11 medalje në një konkurrencë mjaft të fortë:
-
5 medalje ari
-
2 medalje argjendi
-
4 medalje bronzi
Kryetari Kasami vlerësoi lart përkushtimin e sportistëve, duke i cilësuar ata si ambasadorët më të mirë të qytetit.
“Tetova ka sportistë të klasit të lartë. Sporti kërkon disiplinë, rregull dhe mbështetje, dhe pikërisht këtë e kanë treguar karateistët tanë në Istog. Mbetemi të përkushtuar për të përkrahur talentet tona që vazhdojnë të promovojnë qytetin e Tetovës në mënyrën më dinjitoze,” u shpreh Kasami gjatë takimit.
Sporti si prioritet i komunës
Ky sukses i KK “Shkëndija” konfirmon punën serioze që bëhet me gjeneratat e reja në Tetovë. Kryetari i komunës rikonfirmoi se mbështetja për klubet sportive do të jetë e vazhdueshme, me qëllim krijimin e kushteve sa më të mira për zhvillimin e talentit të rinjve tetovarë.
