SHKUP – Deputeti i koalicionit VLEN, Adnan Azizi, ka reaguar me një mesazh të fuqishëm pas zhvillimeve të fundit politike dhe institucionale, duke theksuar se zotimet e dhëna ndaj qytetarëve po kthehen në realitet.
Përmes një shkrimi publik, Azizi ka bërë të ditur se tashmë ka nisur procesi i korrigjimit të asaj që ai e quan “padrejtësi historike” ndaj shqiptarëve në Maqedoninë e Veriut, të cilat sipas tij kanë zgjatur për dekada të tëra.
“Ashtu siç thamë, ashtu u bë”
Azizi ka rikujtuar premtimet e dhëna kohët e fundit, duke lënë të kuptohet se hapat institucionalë – përfshirë rritjen e pagave dhe projektet në infrastrukturë – janë dëshmi e një politike të re vepruese.
“Siç e thamë para gati një jave, ashtu edhe u bë. Një nga një po i përmirësojmë padrejtësitë historike që u janë bërë shqiptarëve në dekadat e fundit. Vazhdojmë!”, ka shkruar deputeti Azizi.
Duke i bashkëngjitur shkrimit të tij deklaratën e kryetarit të Lëvizjes BESA, Bilall Kasami, deputeti Azizi ka rikonfirmuar unitetin dhe vijën e përbashkët të veprimit brenda partisë. Ky sinkronizim mes përfaqësimit në Parlament dhe udhëheqjes së partisë tregon se Lëvizja BESA po vepron me një strategji të unifikuar në të gjitha nivelet, duke i shndërruar zotimet politike në hapa konkretë institucionalë për përmirësimin e pozitës së shqiptarëve.
