SHKUP – Përmes një komunikate zyrtare, Aleanca për Shqiptarët (ASH) ka kujtuar përvjetorin e 27 prillit, duke e cilësuar atë si një moment kthese ku u ballafaquan dy botë: ajo e sakrifikuesve për demokraci dhe ajo e manipuluesve që u strukën ose ikën.
Arritjet që lindën nga 27 prilli ASH thekson se kjo datë shënoi fundin e një regjimi antishqiptar dhe hapi kapitujt më të rëndësishëm për shqiptarët në Maqedoninë e Veriut, si:
-
Zgjedhja e kryeparlamentarit të parë shqiptar;
-
Miratimi i Ligjit për përdorimin e gjuhëve;
-
Anëtarësimi i vendit në NATO.
Dhunuesit: Vrasës në tentativë, jo mbrojtës Në reagimin e saj, Aleanca për Shqiptarët dënon tentativat e sotme për të amnistuar moralisht dhunuesit. Sipas subjektit, debati nëse sulmuesit ishin “mbrojtës të Kushtetutës” apo terroristë është i turpshëm.
“Për të kuptuar se çfarë ishin ata, mjafton të shihni fotot e Ziadin Selës më 27 prill: ata ishin vrasës dhe jo mbrojtës,” thuhet në kumtesë, duke rikujtuar sakrificën fizike të ish-kryetarit të tyre.
Alarmi për rikthimin e regjimit ASH ngre shqetësimin se sot, organizatorët dhe ekzekutorët e asaj nate janë të lirë, ndërsa vë në pikëpyetje rolin e kryeministrit të sotëm në ato ngjarje. Sipas tyre, fakti që regjimi po kthehet dhe dhuna po relativizohet, mbetet një barrë e rëndë për ndërgjegjen e secilit që bëri plane për atë natë të përgjakshme.
Kumtesa përfundon me mesazhin se 27 prilli do të mbetet gjithmonë pika ku u dëshmua se kush i qëndron besnik popullit dhe kush e përdor atë për pushtet.
