Uashington, 19 dhjetor 2025 – Presidenti i Shteteve të Bashkuara, Donald Trump, nuk ka përjashtuar mundësinë e një konflikti ushtarak kundër Venezuelës, në një kohë kur tensionet midis dy vendeve po rriten ndjeshëm. Kjo deklaratë vjen pas vendosjes së një bllokade detare nga SHBA-ja ndaj Karakasit.
Gjatë një interviste telefonike për rrjetin televiziv NBC News, regjistruar të enjten dhe transmetuar sot, Trump u pyet drejtpërdrejt nëse përjashton opsionin e luftës. “Jo, nuk e përjashtoj”, u përgjigj ai pa hezitim.
Presidenti republikan akuzoi liderin venezuelian Nicolás Maduro se drejton një rrjet trafiku droge, akuza që Maduro i ka hedhur poshtë kategorikisht. “Nicolás Maduro e di saktësisht se çfarë dua. Ai e di më mirë se kushdo tjetër”, shtoi Trump, duke refuzuar të sqarojë nëse synimi i tij është rrëzimi i regjimit të Maduro.
Në fillim të javës, Trump njoftoi një “bllokadë të plotë” ndaj anijeve cisternë që janë nën sanksione dhe që lëvizin drejt ose nga Venezuela. Ai paralajmëroi gjithashtu konfiskime të mëtejshme, pas sekuestrimit të një cisterna me naftë venezueliane javën e kaluar.
Këto zhvillime vijnë në një kontekst të shtuar të presionit amerikan ndaj Venezuelës, me sanksione ekonomike dhe masa të tjera që synojnë të dobësojnë regjimin e Maduro. Analistët paralajmërojnë se një eskalim ushtarak mund të ketë pasoja të rënda për rajonin e Amerikës Latine.
