Një dorëheqje e papritur dhe me akuza të rënda ka tronditur themelet e administratës së Presidentit Donald Trump. Joe Kent, Drejtori i Qendrës Kombëtare Kundër Terrorizmit (NCTC), ka njoftuar largimin e tij të menjëhershëm nga detyra, duke u rreshtuar hapur kundër politikës ushtarake të SHBA-së ndaj Teheranit.
“Nuk mund ta mbështes këtë luftë”
Përmes një postimi tronditës në llogarinë e tij zyrtare në platformën “X”, Kent ka deklaruar se ndërgjegjja e tij nuk e lejon të qëndrojë më në krye të inteligjencës amerikane. Ai hodhi poshtë pretendimet zyrtare se Irani përbënte rrezik për Amerikën.
“Pas shumë reflektimesh, kam vendosur të jap dorëheqjen… Nuk mund të mbështes me ndërgjegje luftën e vazhdueshme në Iran. Irani nuk përbënte asnjë kërcënim të menjëhershëm për kombin tonë”, ka shkruar Kent në letrën e tij publike.
Akuza për presion nga “Lobi i Izraelit”
Ajo që ka shkaktuar reagime të shumta në qarqet diplomatike është pretendimi i drejtpërdrejtë i Kent se vendimi për luftë nuk erdhi nga nevojat e sigurisë kombëtare, por nga ndikimet e jashtme.
“Është e qartë se ne e filluam këtë luftë për shkak të presionit nga Izraeli dhe lobi i tij i fuqishëm amerikan”, ka deklaruar ish-kreu i Antiterrorit, duke hapur një debat të ashpër mbi rolin e aleatëve në politikën e jashtme të SHBA-së.
Kush është Joe Kent dhe pse peshon kaq shumë dorëheqja e tij?
Joe Kent (45 vjeç) nuk është një emër i panjohur. Ai është një veteran i dekoruar i Forcave Speciale (Green Beret) me 11 misione luftarake. Jeta e tij është e shënuar nga sakrifica; bashkëshortja e tij e parë, Shannon Kent, u vra në një mision kundër ISIS-it në Siri në vitin 2019.
Emërimi i tij në krye të NCTC-së para tetë muajve, me mbështetjen e Drejtores së Inteligjencës, Tulsi Gabbard, u pa si një lëvizje e Trumpit për të sjellë në sistem njerëz që janë kundër “luftërave të pafundme”. Largimi i tij tregon një përçarje të thellë brenda rrethit të ngushtë të presidentit.
Reagimet: Trump e quan “gjë të mirë”
Presidenti Donald Trump nuk ka vonuar me kundërpërgjigjen e tij tipike. Ai e ka cilësuar dorëheqjen e Kentit si një “gjë të mirë”, duke lënë të kuptohet se administrata e tij nuk do të tolerojë zëra kundërshtues në strategjinë aktuale ndaj Iranit.
Nga ana tjetër, Tulsi Gabbard, e cila ishte eprore direkte e Kentit, u distancua nga deklaratat e tij, duke theksuar se Presidenti si “Komandant i Përgjithshëm” është i vetmi që përcakton se çka përbën kërcënim.
Çka pritet tani?
Kjo dorëheqje pritet të ndezë një debat të zjarrtë në Senatin amerikan, ku demokratët pritet të kërkojnë dëshmi nga Kent mbi informacionet e inteligjencës që ai zotëronte para se të largohej. Ndërkohë, në Lindjen e Mesme, ky lajm po interpretohet si një shenjë e destabilitetit të brendshëm në politikat e Uashingtonit.
