TIRANË – 10 shkurt 2026 | Kryeministri i Shqipërisë, Edi Rama, ka reaguar me tone mjaft të ashpra ndaj njërit prej prokurorëve të Hagës, pas deklaratave të bëra gjatë fjalës përmbyllëse të organit të akuzës në procesin ndaj krerëve të ish-UÇK-së.
Shkak për këtë reagim është bërë pohimi i prokurorit, sipas të cilit Hashim Thaçi kishte arritur t’u maskonte realitetin e ngjarjeve në terren zyrtarëve të lartë amerikanë, James Rubin dhe Wesley Clark.
“Ajo që s’kuptojnë Rubin dhe Clark, është se Thaçi ishte i aftë të maskonte atë që po ndodhte në realitet dhe kjo ndikoi në botëkuptimin e tyre”, ka deklaruar prokurori gjatë seancës.
Menjëherë pas kësaj, Kryeministri Rama ka përdorur rrjetet sociale për të kundërshtuar këtë qëndrim, duke e cilësuar prokurorin në fjalë si një “idiot ndërkombëtar”. Sipas Ramës, pretendimi se Thaçi ka manipuluar figurat kryesore të diplomacisë dhe ushtrisë amerikane gjatë kohës së luftës është i papranueshëm dhe fyes për realitetin historik.
Ky reagim vjen në një moment kulminant të procesit në Hagë, ku palët po paraqesin argumentet e tyre përfundimtare para shpalljes së aktgjykimit.
