ROMA – Çmimet globale të ushqimeve kanë shënuar rënie edhe gjatë muajit janar, duke regjistruar kështu muajin e pestë radhazi të lirimit. Ky trend vjen si pasojë e rritjes së rezervave botërore të drithërave, të cilat po i afrohen majave historike, sipas raportit më të fundit të Organizatës së Ushqimit dhe Bujqësisë të Kombeve të Bashkuara (OUBKB – FAO).
Indeksi i çmimeve të ushqimeve, i cili monitoron lëvizjet mujore të çmimeve të produkteve bazë në tregjet botërore, zbriti në 123,9 pikë në janar. Kjo vlerë është 0,4% më e ulët se në dhjetor dhe 0,6% më e ulët se në janarin e vitit të kaluar.
Analiza sipas sektorëve:
Drithërat: Ndonëse u shënua një rritje e lehtë prej 0,2% krahasuar me dhjetorin, kjo u balancua nga rënia e çmimit të grurit dhe misrit. Rezervat e bollshme në Rusi dhe SHBA kanë qetësuar tregjet, pavarësisht kushteve të vështira atmosferike.
Vajrat Vegjetalë: Ishte i vetmi sektor me rritje të ndjeshme prej 2,1%. Ky shtrenjtim erdhi kryesisht nga vaji i palmës, për shkak të rënies sezonale të prodhimit në Azinë Juglindore, dhe nga vaji i sojës për shkak të kërkesës së lartë për biokarburante.
Mishi: Çmimet ranë me 0,4% në janar. Ndikimin kryesor e pati mishi i derrit, i cili u lirua për shkak të ofertës së madhe globale dhe kërkesës së dobët ndërkombëtare për import.
Produktet e Qumështit: Kjo kategori shënoi rënien më të madhe me 5% krahasuar me dhjetorin. Lirimi erdhi si pasojë e rënies së çmimit të djathit dhe gjalpit në tregjet botërore.
Sheqeri: Shënoi rënie prej 1%, falë parashikimeve për rritje të prodhimit në Indi, Brazil dhe Tajlandë.
Rezervat drejt rekordit të ri
Sipas parashikimeve të azhurnuara të OUBKB, rezervat globale të drithërave pritet të rriten me 7,8%, duke arritur nivele rekord. Ky stabilitet në furnizim është faktori kryesor që po mban çmimet nën kontroll, pavarësisht tensioneve gjeopolitike apo sfidave klimatike në rajone të caktuara prodhuese.
