Pas tre viteve në krye të diplomacisë amerikane në Shkup, ambasadorja Angela Aggeler i është drejtuar qytetarëve të Maqedonisë së Veriut me një letër të hapur emocionale përpara largimit të saj. Aggeler, e cila u emërua si ambasadorja e dhjetë e SHBA-së në vend në vitin 2022, bëri një përmbledhje të arritjeve, por edhe të sfidave që mbeten pezull.
Beteja me korrupsionin dhe “Listat e Zeza” Një nga shtyllat më të forta të mandatit të saj ishte lufta e paasajshme kundër korrupsionit. Në mesazhin e saj, Aggeler theksoi se miqësia e vërtetë kërkon sinqeritet:
“Kjo do të thotë të kritikosh korrupsionin dhe organizatat kriminale, të kontribuosh në reformat në drejtësi dhe të sanksionosh ata që ju kanë vjedhur prej vitesh pa u ndëshkuar,” shkroi ajo, duke iu referuar masave të forta që SHBA mori ndaj zyrtarëve dhe ish-zyrtarëve të përfshirë në korrupsion.
Arritjet strategjike Aggeler vuri në dukje se viti 2025 shënoi 30-vjetorin e marrëdhënieve dypalëshe, duke përmendur si suksese:
-
Mbrojtjen: Modernizimin e ushtrisë me automjete taktike dhe stërvitjet në Krivollak.
-
Infrastrukturën: Përparimin në Korridorin 8 dhe 10, projektet më të mëdha në historinë e vendit.
-
Energjinë: Hapat drejt pavarësisë energjetike dhe sigurisë kibernetike.
Një mesazh personal për qytetarët Ambasadorja u shpreh se largohet me një besim të shtuar te forca dhe guximi i popullit maqedonas. Ajo kujtoi takimet nëpër shkolla, kisha, ferma e vreshta, ku sipas saj, njerëzit ndanë jo vetëm vizionin, por edhe zhgënjimet e tyre. “Ekziston diçka magjike në këtë vend – bukuria e tij, historia, por mbi të gjitha qëndrueshmëria dhe humori i jashtëzakonshëm i njerëzve në mes të sfidave të mëdha,” u shpreh ajo.
Aggeler e mbylli mesazhin e saj duke theksuar se SHBA do të mbetet gjithmonë një partner i sigurt dhe se ëndrra për një vend plotësisht të integruar në familjen evropiane është e arritshme nëse qytetarët vazhdojnë të besojnë te forca e tyre.
