TIRANË – Sot mbushen 75 vite nga një prej akteve më makabre të terrorit shtetëror komunist në Shqipëri. Më 26 shkurt 1951, me urdhër të drejtpërdrejtë të diktatorit Enver Hoxha, u ekzekutua pa asnjë proces gjyqësor Sabiha Kasimati, shkencëtarja e parë shqiptare, në moshën vetëm 38-vjeçare, raporton Kohanews.
Sabiha Kasimati nuk ishte thjesht një viktimë e radhës; ajo ishte një mendje e ndritur dhe një grua e jashtëzakonshme e dedikuar tërësisht kërkimit shkencor. Eliminimi i saj brutal dëshmon frikën që regjimi kriminal kishte ndaj intelektit, lirisë së mendimit dhe dinjitetit njerëzor. Ky ekzekutim pa gjyq mbetet një nga krimet më të rënda dhe më të turpshme të diktaturës komuniste, duke shërbyer si një dëshmi e qartë e mizorisë dhe barbarisë së atij sistemi çnjerëzor.
Vrasja e Sabihasë nuk ishte vetëm shuarja e një jete premtuese, por një përpjekje e dëshpëruar e regjimit për të vrarë dijen dhe të ardhmen e një kombi. Ajo u arrestua pas ngjarjes së bombës në Ambasadën Sovjetike, një pretekst që regjimi e përdori për të eliminuar elitën intelektuale të vendit, pa pasur asnjë provë apo lidhje me ngjarjen.
Në fotografinë që shoqëron këtë përkujtim, e realizuar në vitin 1942 nga fotografi i mirënjohur Kristaq Sotiri, Sabiha Kasimati shfaqet me gjithë fisnikërinë e një gruaje që i përkiste botës së dijes. Sot, emri i saj qëndron si një akuzë e përjetshme kundër komunizmit dhe si një simbol i pathyeshëm i viktimave të pafajshme që u flijuan në emër të lirisë dhe shkencës.
Kujtimi i Sabiha Kasimatit mbetet i pashlyeshëm në historinë e Shqipërisë, si një thirrje për të mos harruar kurrë çmimin e lartë që intelektualët shqiptarë paguan nën thundrën e diktaturës gjakatare.
/ KOHANEWS
